I nimwaloth i bain a phant,
I laiss in end calen nadhras,
Calad egennir mi i lant
E geil mi dhúath thiliol
Tinúviel i lilthas ias
Na lind o simp dholen a brand,
A vi finnil dîn glîn ennas,
A vi chammad dîn míriol.

Nu laiss Beren erui padas,
Ab aegais ring dad túliel,
Ennas i elduin sirias
Nûr a erui reniol
Min laiss en-gwaloth tíriel
Glinthant mellys lassui ennas
Na choll a rainc dîn derthiel
Sui dae finnil dîn aphadol

I lûth nestant i dail naegrol
Berthennin dhyl athreviad;
Agamp geleg ha vell, bragol,
Mabant ithildim thiliol.
Trî 'aladhremmin eldorath
He dregas fair na dail lilthol
Awarthant Beren reniad
Erui vi daur dhínen lastol.

Sui laiss dulus i thail ellint
Lastant ennas lhyss reviol,
A vi imlaid thyrin i lind,
Ennas eithelui tuiol.
Si nimwaloth i tharn, thinnol
a thloss ath thloss vi i chelch thind
laiss e-mrethil vi daur dharthol
hain sui gwilwileth sí dannol.

Ún chir hen revias palan
Erin laiss caedennin ennas,
Nu 'ilgalad a nui gúran
Vi menel edhring míriol.
Nu ithildim coll dîn tinnas
Sui caw amon, haeron a brann
Na dail dîn peliol, lilthas
I chîth gelebren hwiniol.

Udul he ad ne thrîw dregol,
Linn dîn leithiant i ethuil,
Sui tuilinn a rhoss dannol,
A nen udul o loss glavrol.
Egenn tuiad niphredil
Na dail dîn, nestas aphadol
anírant lilthad na mrennil
Linnol am nadhras úbrestol.

He dregas ad, dan ho nerant,
Tinúviel! Tinúviel!
Eneg edhellen dîn estant;
adhor ennas lû hen lastol.
Ne phost thent Beren, túliel
Na lûth ed lam dîn gen gwedhant
Si barthannen Tinúviel
Dorthas vi rinc dîn thiliol.

Beren tirant na chîn iell
Vi 'wath finnil dîn velui,
O elenath aglar menel
Egent ennas i míriol.
Tinúviel elvanui
Elleth alfirin edhelhael,
O hon ring finnil fuinui
A renc gelebrin thiliol.

I dhoer manath únodui,
Trî annon dûr, angren thamas
Am ered gondeb, hithui
A thaur dhúatheb angoeol.
I aearon min hain dorthas,
Govanner hai na vedui,
Pelanner io anann ennas
Úníniel vi daur linnol.